香港民族:定義同釋疑

41st Jun 24, 2020

最近大家多咗講「香港民族」,希望讀者真係明白我哋所提倡嘅香港民族主義。民族主義嘅重要性在於:佢係獨立嘅論述基礎,都係抗爭意志嘅強心針。香港人冇得學以色列人借助宗教信仰,唯有以香港民族主義作為政治信仰,噉先可以為抗爭注入能量,同時紮根本土,守護香港人身份嘅獨特性,免受中共同化。

定義介紹

小詞典:民族主義與民族

民族主義係一種意識形態,即係有班人想像自己係一個共同體,並認定共同體有一定政治權利。民族主義建基於「主權在民」,主張將治權或主權賦予人民,與民主原則密不可分。民族有權決定自己嘅政治前途同命運,即係「自己香港自己救」、「命運自決」。

而民族,就係一個錯綜複雜嘅概念,既要主觀認同,亦要客觀條件。主觀認同以共同公民價值、集體想像同感情為基礎:我哋能夠想像手足嘅痛苦、想像200萬個素未謀面嘅香港人、聽到《願榮光歸香港》會流淚。客觀條件指特定邊界、共同歷史、共同語言或經濟生活:我哋喺港九新界生活、有本土歷史、講廣東話、鐘意去茶記食早餐。民族係由主觀同客觀因素交織而成嘅群體,兩者缺一不可。

如何定義「公民價值」?

成日講香港人嘅共同價值係反共、民主、自由、法治,但用普世價值作民族定義未免太過模糊。香港民族歷經時代革命,已經將公民價值實踐喺抗爭中,五大訴求正正就係公民價值嘅體現。例如撤回修例代表對中共嘅抗拒;撤回暴動定性、釋放義士、追究黑警濫權就係追求一個公義嘅司法制度同社會;真普選就係實現自由民主嘅共同願景。五大訴求已經清楚勾畫出香港民族嘅界線,以及香港憲法嘅雛形,並得到廣大香港人嘅認同。

打破迷思

香港民族主義係排外、狹隘?

點樣區別或定義邊個係共同體嘅成員?我哋可以用民族主義嘅兩種經典框架作分析:

1. 公民民族主義(civic nationalism):強調維繫群體嘅公民價值、互相契合嘅意願。例如會唔會追求自由民主。
2. 族群民族主義(ethnic nationalism):強調共同血緣、信仰或祖先。例如所謂黃皮膚黑眼睛。

前者強調內在嘅主觀意志,較開放、多元。而後者強調外在嘅客觀條件,則相對排外、狹隘。《香港民族論》以公民民族主義建構香港民族論述,尊重個體意願,以公民價值作界線,而非人種血緣。梁天琦並非香港出世嘅例子,亦早已打破對血緣論嘅迷思。香港人成日將「種族」同「民族」混淆,導致好多不必要嘅誤解。

邊個算係香港民族?

容易令人認為民族主義狹窄嘅,仲有呢條問題:如果香港人係一個民族,噉愛國藍絲點計?愛國藍絲賣港求榮、擁抱極權,但因為制度上嘅缺陷,佢哋都係香港永久性居民,無可避免係「廣義香港人」。自稱香港人,但不問世事嘅港豬,則可歸類為「狹義香港人」。如果你係認同五大訴求,睇新聞睇到喊,甚至會投入抗爭,就可視為「香港民族」嘅一份子。香港民族肯定唔係包含晒700萬香港人,但佢比大家想像中更開放:不論膚色種族,每個人都能夠隨時按意願融入香港民族。

香港民族主義係侵略、壓迫工具?

對於大國嚟講,可能會利用民族主義對外展開軍事及經濟擴張,如德國納粹主義;對內就壓迫其他少數民族,如中共壓迫圖博人。但對於香港呢啲相對弱小嘅「無國家的民族」嚟講,民族主義只係團結抗爭力量、抵抗中共同化嘅防衛性手段。

香港民族主義並唔邪惡

喬治華盛頓大學名教授Amitai Etzioni將新興嘅香港民族主義視為一種優質嘅民族主義發展,並預言香港民族主義好快會「台灣化」。因為香港民族主義嘅形成過程係基於抵抗極權、追求自由民主,而非基於血緣、宗教、排斥外來移民。面對已經誕生嘅香港民族,我哋唔應該避之則吉,反而應該擁抱呢個屬於自己嘅身份認同。

「我們是小國小民,但我們是好國好民。」——台灣建國烈士鄭南榕

參考資料:

學苑(2013),《香港民族論》。
Amitai Etzioni (2019). ‘Good’ vs ‘Bad’ Nationalism in Asia. The Diplomat.



文:良善如你
粵文文章
Great! You've successfully subscribed.
Great! Next, complete checkout for full access.
Welcome back! You've successfully signed in.
Success! Your account is fully activated, you now have access to all content.