首先係噉樣，然後係噉樣，跟住係噉樣。

政府話冇三權分立，其實大家知唔知道係講緊啲乜嘢？政府「取消」三權分立，唔係真理部做嘢咁簡單：大家首先要明白，港共口中所謂嘅三權分立，即係話要「行政做主導」。提醒吓大家，林鄭月娥個官職稱謂係：香港特別行政區行政長官。

咁大家就明白咩嘢叫做行政做主導。如果大家仲係唔明嘅話，我可以同你講——以後唔需要立法會、唔需要橡皮圖章，就謂之「行政做主導」。

三權（行政、立法、司法）分立其中，所謂嘅立法，就係立法會——雖然已經廢咗武功好耐。早在over my dead body之前，立法會已經名存實亡。（但至少舊年7月1號大家都仲係要入去探訪一下。）

大家要配合「冇三權分立」呢樣嘢，再回頭去理解吓：「點解唔可以投票，但可以返學、可以開書展？」究竟成套排山倒海噉打埋嚟嘅連環拳，係代表緊啲乜呢？

By the way，而家政府就係噉將每樣嘢分拆上市：一樣冚一樣，令你頭暈眼花。但如果你心水清知佢做緊乜嘢，你就會明白佢絕對唔係白痴。

By the way，政府內部消息話又要收返舊版嘅基本法，今次唔知又改咗啲咩呢？

By the way，仲會攞「基本法有險可守」出嚟講嘅話，你就先至真係⋯⋯戇居！

文：高雄