專訪-連登紅人麵咪媽

活潑嘅媽咪麵（麵咪媽暱稱）做完首階段療程後，以橫掃千軍銳不可擋嘅氣場，重臨連登財經台，信心滿滿睇好已走上太空嘅Tesla。由於一眾巴絲愛麵心切，不以為意紛紛留言支持；殊不知神隱一排後嘅麵麵威力勁過一尊，遠至美國嘅Tesla都就此插水⋯⋯貨已重嘅巴絲只能暗暗嘆一聲：too simple, sometimes naive.

《牆紙》喜見媽咪麵雄赳赳再現，專誠搵佢做咗個訪問，等大家認識佢多啲之餘，睇吓會唔會有助各位趨吉避凶、再見家鄉。

記者：記
媽咪麵：媽

記：由幾時開始喺連登出post？係咪每日都會習慣去睇吓？
媽：當初我係上高登，之後先轉去連登；而買股票係上連登之後先識。嗰陣啱啱開始接觸牛熊，自己心態上頂唔順咁刺激嘅股票衍生工具，又唔想同身邊嘅人講，所以就去咗財經台尻叫。係呀，每日得閒都會上去睇吓。

記：有冇諗過自己會咁受歡迎？你估原因係咩呢？感受如何？
媽：冇唸過會咁受歡迎（都唔係好受歡迎啫🤔），因為當初買牛熊係咁輸，喺連登出帖主要用意都係想同人呻吓，同埋學吓嘢。
至於講到點解我咁受歡迎⋯⋯就緊係一個字：準！
我分析股票嗰陣又會畫圖，又會參考書中嘅技術分析（我有自己買書自學，同埋上網睇其他人嘅教學）；加上會融入埋當時嘅時事局勢分析；再再加上本人性格非常冷靜、理性、客觀，種種元素加埋至比較易得出咁精準嘅預測。😎
對於有咁多網友支持，我梗係非常開心；佢地嘅支持同鼓勵，亦都化為我繼續鑽研股票投資嘅動力。喺度想同佢地講聲：「非常多謝你哋，冇你哋就冇我媽咪哥。將來嘅日子喺我帶領之下，大家一定可以戰勝大戶㗎！！！」

記：坊間有傳你喺財經界搵食，其實你本職係咪真係嗰一行？定純粹只係興趣？
媽：哩個問題問得好呀，終於有個機會俾我澄清一下。其實我唔係喺財經界搵食，亦唔係啲咩大戶、ibanker，更加冇收到大戶所謂嘅貼士；我嘅分析完完全全係基於我本人嘅精密計算所推斷出嚟。我本職其實係做地盤嘅，有段時間返嗰個地盤就起貨，日日返到去都冇野好做，咪搵啲嘢搞吓囉！咁你都知，地盤除咗賭，就都係得賭。我想賭得好似專業啲，咪去接觸股票囉，起碼輸咗都可以同人講我只係投資失利咋⋯⋯聽落係咪型好多呢！

記：身為連登財經台紅人，你對「連登文化」有咩睇法呢？

媽：連登文化⋯⋯我覺得連登就係一個比現實社會更真實嘅地方，每個人都可以放低自己嘅身份——唔理你係大醫生定小學生，都可以好自由，鐘意講乜就講乜。講粗口當食生菜，想狙撃又得，要人身攻擊都得（我小學雞時上嗰啲forum連粗口都唔俾打）；總之連登仔把口又衰又賤，乜都講得出！（依點我個人係好鐘意😂 ) 以上種種喺現實社會根本唔容許，而呢代香港人就正正係想追尋依份不受拘束、慢慢消失緊嘅言論自由。（帶返頭盔先：各位連登巴絲，講還講，唔好犯法呀！特別係國安法，你懂的）

記：驚聞你早前患上重病，依家病情穩定咗未？心情有冇平復到？
媽：係，我患上咗未期腦癌（膠質母細胞瘤／GBM），條命仔凍過水，應該仲有一兩年到啦！😂 經過之前嘅外科手術及電療之後，依家身體叫做好返啲，亦冇即時嘅生命危險，但跟住半年都仲要接受化療療程。我都有同屋企人、網友一齊去尋求新嘅治療方法，暫時搵到有交流電場同免疫療法或者可以試吓，會喺完成化療後約11月中再諮詢主診醫生，先決定下一步。
至於心情方面，就點都唔會好似以前咁開朗，尤其喺當初啱啱知道自己有依個病嗰陣，EQ高如我媽咪哥都喊到癲咗⋯⋯係日日喊呀！不過依家心情已經好咗好多；當然好似依家咁提起，個心仍然會𢲡住𢲡住。雖然我唔係含著金鎖匙出世嘅有錢仔，甚至只係喺屋村長大，但正正因為咁，我父母唔會好似依家啲怪獸家長咁逼我行一條佢哋認為好嘅路，反而俾好多自由我。（無計佢哋忙著出去搵食，由得我自生自滅😂 ）我想去邊玩就去邊玩，想做乜就做乜，諗返轉頭其實我今世都幾幸福，儘管當中有辛酸嘅時刻；假如我冇依個病你話幾好呀，最起碼唔使死嗰刻仲要父母照顧我，要白頭人送黑頭人，又唔使我家姐拎哂啲積蓄幫我醫病。唉⋯⋯講咁多其實我⋯⋯我真係唔捨得咁快離開呢個世界呀！😭

記：世事難料、時局變幻莫測。香港現正處於動盪時期，對於股市前景，有咩寄語俾香港人？
媽：香港依家正處於動盪嘅時期，不過仲未到最黑暗嘅一刻。我對香港嘅未來都幾唔樂觀，但我想講：希望香港人唔好絕望，只要肯堅持落去，我相信會有奇蹟㗎！就正如我買牛熊要戰勝大戶、我自己要戰勝病魔，睇起上嚟都好似冇乜可能，但只要跟我媽咪哥一樣憑住信念堅持落去，一定可以笑到最後！

後記：

媽咪麵大受歡迎，有好多巴絲透露過係其實因為佢風趣幽默又夠正能量。喺現今咁壓抑嘅社會，可以令你放鬆笑一笑，確實難能可貴。佢展現出香港年輕一代肯捱又夠搏、唔識咪自學、衰咗再嚟過嘅一面，而且都願意相信自己、肯定自己。或許未來嘅「香港」不再繁華璀璨，但「香港人」依舊光芒耀眼。

媽咪哥，你要加油呀！願你戰勝病魔，重拾健康。

文：Caca-cola