揸緊枝筆

只要有心，人人都可以揸筆寫字。之但係並非所有揸筆嘅人都可以寫到通達嘅文章。如果唔想好似對家啲文噉含糊不清，搞到閱讀經歷好似泥漿摔角，的確係有啲技巧。

1）寫作最緊要係知道自己要寫啲乜嘢，同埋寫畀邊個睇。

2）篇文個標題係可以吸引嗰個(啲)人想睇你寫嘅嘢，但唔係乞人憎嗰種。

3）文章唔使「首尾呼應」，所以請你好好構思篇文嘅起首句同埋點樣埋個靚尾。

4）合理咁編配每段落嘅比例，請體諒讀者，喺潛意識之中顧及朗誦長度及難度。

5）每個段落、每個論點以至整篇文章，最重要一定係起首第一句。

6）段落同段落之間要互相銜接， 千祈咪將唔相關嘅段落擺埋一齊製造干擾。

7）要善用例子。好似依家咁將四個重點扣連， 一氣呵成咁解釋清楚件事。

8）任何文章都講究層次推進，能夠將每個論點配合有序及適當嘅例子，一層一層咁表述出嚟係非常重要。因為即使對手一開始係唔鍾意你依個人，但至少佢會睇得明你講乜嘢。

9）就算有幾多嘢想講都好，一定要識得停手，就好似而家咁樣——完。

文:AFriday