以香港作為信仰

46th Dec 07, 2020
作者:良善如你

【以香港作為信仰】

國安法後抗爭進入休整期,抗爭陣營充斥住無力感,出現好多內部矛盾同互相指責。勝出民主派初選嘅張可森曾寄語希望大家以「香港作為信仰」,雖然信仰對香港人嚟講好陌生,但共同嘅信仰正正係我哋呢一刻最需要嘅嘢。

信仰戰勝極權人

擁有信仰唔代表係信奉某種宗教或神明,宗教只係其中一個表現信仰嘅方式。信仰係一種我哋生而為人,選擇相信嘅價值觀;可以係生活方式,亦可以係人生意義。喺極權統治下,人民失去集會自由同表態嘅空間,難以透過參與群眾運動凝聚力量,個體都變得非常脆弱。縱觀歷史長河,好多經歷過極權統治嘅民族都各有宗教信仰,幫助佢哋喺苦難中維繫群眾。猶太人散落世界各地,因為猶太教義而決心復國;波蘭人以天主教作為後盾,喺共產統治下保存到文化同傳統;藏人信奉藏傳佛教,不怕犧牲同中共戰鬥到底。極權冇辦法奪去人民內心嘅信仰,信仰係人民對抗極權嘅希望。

為信仰而抗爭

當街頭抗爭稍為靜止,有人會為表面抗爭人數嘅減少而灰心喪志,用冷嘲熱諷嘅方式指責其他人付出唔夠多,有從眾同比較心態。信仰係每個人內在嘅信念,反而唔會輕易受外在因素影響。當抗爭漸漸失去畫面同關注,就係真正考驗信仰嘅時候。我哋甚少見基督徒會因信徒嘅多寡而自怨自艾,甚至放棄信仰。哪怕世上只剩下一位信徒,佢哋仍然視傳福音為使命。當你立志以抗爭為使命,就無需太在意民智嘅高低、計較各人付出嘅多少。抗爭唔係因為香港人值得與否,而係要對得住自己嘅身份;堅持亦唔係因為從眾,而係為自己心中嘅信仰。

相信香港呢片土地

面對極權,有人選擇移民,並經常引用猶太人做例子,表示離開唔代表放棄抗爭。猶太人作為離散民族,飄泊流亡過千年,終能復國全因為有共同信仰去維繫自身共同體。佢哋堅信猶太教義中復國嘅預言,即使散落各地都仍然心繫以色列本土。若以香港作為信仰,「煲底之約」就等同於香港人信仰嘅預言。世上只有一個煲底,無論係流亡海外定係身陷囹圄,我哋都期待煲底下除罩相擁嘅一日。移民只係手段,大家追求嘅係喺香港呢片土地上實現民主自由,而非到外國去享受自由嘅果實。維繫香港人嘅係紮根本土嘅信仰,就算被迫要逃離家園,都要確信香港呢片土地係唯一安身立命之所,係信仰嘅應許之地,別無他處。

相信每一個香港人

有人擔心香港人會放棄抗爭,背棄曾經相信嘅價值,但信仰能透過個人經歷得以鞏固;有人覺得雨傘後難再有大型抗爭,結果五年後香港人成就咗一場波瀾壯闊嘅革命。信仰嘅種子早已透過共同經歷栽種喺我哋心中,並會隨着實踐中萌芽成長。以香港作為信仰、相信香港人依個共同體,過去一年嘅抗爭足以見證香港人嘅勇敢、智慧同團結。不論你、我、他或她,早已成為香港嘅信徒,一息尚存,抗爭到底。

相信香港終會重光

缺乏信仰嘅人容易迷失,因為太過著眼於最後嘅成敗得失。信仰嘅強大在於即使睇唔到結果,你都願意繼續相信。正如基督徒唔會質疑耶穌會否再臨,只係未知幾時重臨,信徒應該著眼於實踐信仰嘅過程,努力去傳福音。同樣地,我哋要堅信香港終會重光。如果連香港人自己都唔相信會贏,試問又點可能實現夢想呢?喺黎明來到之前,作為香港人要莊敬自強,生活上無時無刻緊記要實踐信仰。哪怕再漫長嘅黑暗,擁有信仰嘅香港人都能化為一點燭光,照亮身邊孤單困倦嘅手足,共同迎來重獲新生嘅香港。

用一生證明香港嘅存在

假若你缺乏宗教信仰,又或者對香港未來充滿疑惑同困倦,請別輕言放棄。懇請你再次相信香港,相信香港人。將過去一年共同經歷嘅苦難、手足之情同願景,視為一種我哋甘願為此抗爭、堅持同犧牲嘅信仰。

巴勒斯坦裔學者 Edward Said 講過巴勒斯坦人嘅命運,係要用一生去證明巴勒斯坦嘅存在。作為香港嘅信徒,我希望可以用一生去證明香港嘅存在。只要我哋仍然相信香港,香港就會存在。

在晚星墜落徬徨午夜,願各位堅守香港人嘅信仰,煲底見。



作者:良善如你

Great! You've successfully subscribed.
Great! Next, complete checkout for full access.
Welcome back! You've successfully signed in.
Success! Your account is fully activated, you now have access to all content.